ხელვაჩაურის კულტურის ცენტრში, აჭარის რეგიონში სიმღერისა და ცეკვის ბავშვთა ფოლკლორული ანსამბლების ოლიმპიადის პირველი ეტაპი ჩატარდა.
შესარჩევი ტურები აჭარის ყველა მუნიციპალიტეტში გაიმართა. სპეციალური საკონკურსო კომისიის წინაშე ხელვაჩაურის, ქობულეთის, ქედის, შუახევის, ხულოსა და ბათუმის მუნიციპალიტეტების 30-მდე ქორეოგრაფიული და სასიმღერო ანსამბლი და 800-ზე მეტი ბავშვი, მრავალფეროვანი ნომრით წარსდგა.
გამარჯვებული ანსამბლების, დაჯილდოების ცერემონია და გალა კონცერტი 3 ივნისს, ბათუმის სახელმწიფო მუსიკალურ ცენტრში გაიმართება.
ოლიმპიადა აჭარის კულტურის სამინისტროს პროგრამის – „ფოლკლორის ხელშეწყობა და პოპულარიზაცია“ ფარგლებში ხორციელდება.
ოლიმპიადის მიზანია ტრადიციული ხელოვნების, ქართული ხალხური სიმღერისა და ცეკვის წარმოჩენა და პოპულარიზაცია ახალგაზრდა თაობაში, ნიჭიერი შემსრულებლების გამოვლენა და მონაწილეთა შორის შემოქმედებით სიახლეთა გაზიარება.
