საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარე მაია ბითაძემ და გარემოს დაცვისა და სოფლის მეურნეობის მინისტრის პირველმა მოადგილემ ნინო თანდილაშვილმა, ბათუმის მუნიციპალიტეტის საკრებულოს სხდომათა დარბაზში აჭარის მუნიციპალიტეტების ხელმძღვანელ პირებთან და ბათუმის საკრებულოს წევრებთან შეხვედრა გამართეს.
შეხვედრაზე, ,,საქართველოს სივრცის დაგეგმარების, არქიტექტურული და სამშენებლო საქმიანობის კოდექსში“, შეტანილი ცვლილების შესახებ ისაუბრეს, რომლის მიხედვით მშენებლობის ნებართვის გაცემის პროცესში წარდგენილ დოკუმენტებში გამწვანების პროექტის, როგორც თანამედროვე, გარემოსდაცვითი სტანდარტების მქონე დოკუმენტის არსებობა, სავალდებულო გახდა.
საქართველოს მთავრობამ, კანონით გათვალისწინებულ ვადაში, უზრუნველყო საქართველოს მთავრობის დადგენილებების ზემოხსენებულ კანონთან შესაბამისობაში მოყვანა.
,,საქართველოს სივრცის დაგეგმარების, არქიტექტურული და სამშენებლო საქმიანობის კოდექსში“ განხორციელებული ცვლილებებიდან გამომდინარე, კომიტეტის ხელმძღვანელთა დღევანდელი შეხვედრა მუნიციპალიტეტების წარმომადგენლებთან სწორედ ადგილობრივ დონეზე, გამწვანების პროექტის აღსრულებისა და იმპლემენტაციის სამუშაოების დაწყებას უკავშირდებოდა.
შეხვედრას ხელვაჩაურის მუნიციპალიტეტის მერი ზაზა დიასამიძე, საკრებულოს თავმჯდომარე თენგიზ ირემაძე, აჭარის მუნიციპალიტეტების მერები, საკრებულოების თავმჯდომარეები, აჭარის სოფლის მეურნეობის მინისტრი, მინისტრის მოადგილე, აჭარის სოფლის მეურნეობის სამინისტროს საქვეუწყებო დაწესებულების გარემოს დაცვისა და ბუნებრივი რესურსების სამმართველოს უფროსი და ბათუმის საკრებულოს წევრები ესწრებოდნენ.
