ხელვაჩაურის მუნიციპალიტეტში საქართველოს სანაპირო ზონის სივრცითი დაგეგმარების პროექტის ფარგლებში სამუშაო შეხვედრა გაიმართა.
შეხვედრას ხელვაჩაურის მუნიციპალიტეტის მერი ზაზა დიასამიძე დაესწრო, ხოლო პროექტის მიმდინარეობისა და მომდევნო ეტაპების შესახებ ისაუბრა პროექტის კოორდინატორმა, ურბანული და გარემოსდაცვითმა დამგეგმავმა, კლიმატის ცვლილებასთან ადაპტაციის სპეციალისტმა, მასიმილიანო გრანჩერი ბრადასკიამ.
სამუშაო შეხვედრაზე განიხილეს საქართველოს სანაპირო ზონისა და ტერიტორიული ზღვის სივრცითი დაგეგმარების გეგმის მომზადების მიმდინარე ეტაპი, ხედვისა და სტრატეგიის შემუშავების პროცესი, ადგილობრივი თვითმმართველობის როლი პროექტის განხორციელებაში, ასევე სამომავლო თანამშრომლობის ძირითადი მიმართულებები.
შეხვედრას ესწრებოდნენ ხელვაჩაურის მუნიციპალიტეტის საკრებულოს თავმჯდომარე, არჩილ მხეიძე, ხელვაჩაურის დელეგატი აჭარის ავტონომიური რესპუბლიკის უმაღლეს საბჭოში, საკონსტიტუციო, იურიდიულ და საპროცედურო საკითხთა კომიტეტის თავმჯდომარე, მინდია დიასამიძე და მერის მოადგილე გიორგი ქარცივაძე.
