ხელვაჩაურის მუნიციპალიტეტის მერი ზაზა დიასამიძე დაესწრო ხელვაჩაურის მეჩეთში გამართულ სადღესასწაულო ლოცვას, რომელიც ყურბან ბაირამის დღესასწაულთან დაკავშირებით გაიმართა. ლოცვის დასრულების შემდეგ, მერმა მიულოცა მუსლიმებს ყურბან ბაირამი, უსურვა მშვიდობა, კეთილდღეობა და ერთიანობა.
ლოცვას, ასევე ესწრებოდნენ აჭარის უმაღლესი საბჭოს წევრი მინდია დიასამიძე, მერის მოადგილეები და ადგილობრივი თვითმმართველობის სხვა ხელმძღვანელი პირები.
ყურბან ბაირამი ერთ-ერთი ყველაზე მნიშვნელოვანი დღესასწაულია მუსლიმური რელიგიური კალენდრის მიხედვით. იგი მოძრავი თარიღის მქონე დღესასწაულია და მარხვის დასრულებიდან 70-ე დღეს აღინიშნება. დღესასწაული მსხვერპლშეწირვას, ქველმოქმედებასა და ახლობლებთან ერთობლივ ზეიმს მოიცავს და მისი მთავარი არსია სულიერი განწმენდა, თანამოძმეზე ზრუნვა და ღვთისადმი მადლიერების გამოხატვა.
