„ჩემი პირველი ნერგი“ – პროგრამის ფარგლებში 41 000-ზე მეტი პირველკლასელი საქართველოს მასშტაბით საკუთარ პირველ ნერგს რგავს.

საქართველოს მთავრობის ინიციატივით, 41 000-ზე მეტი პირველკლასელი ქვეყნის მასშტაბით გამწვანების მასშტაბურ ღონისძიებაში იღებს მონაწილეობას და საკუთარ პირველ ნერგს რგავს.

ნერგების დარგვის ღონისძიებები ხელვაჩაურის მუნიციპალიტეტში გაიმართა, სადაც 720-მა პირველკლასელმა დარგო თავისი პირველი ხე.

პროექტი გარემოს დაცვისა და სოფლის მეურნეობის სამინისტროსა და გარემოსდაცვითი ინფორმაციისა და განათლების ცენტრის ორგანიზებით ხორციელდება.

პროგრამის ფარგლებში, ნერგების დარგვა 22 ოქტომბერს დაიწყო და 9 ნოემბრის ჩათვლით გაგრძელდება. ამ პერიოდში თბილისსა და საქართველოს ათივე რეგიონში, ჯამში 41 000-ზე მეტი ნერგი დაირგვება.
ხელვაჩაურის მუნიციპალიტეტში სხვადასხვა სახეობის ნერგი დაირგო, რომლებიც ბუნებრივი და კლიმატური პირობების გათვალისწინებით შეირჩა. ესენია: კავკასიური ფიჭვი, კავკასიური ცაცხვი, კოლხური ბზა, მინდვრის ნეკერჩხალი, პირამიდალური ვერხვი, პირამიდალური კვიპაროსი, ქართული მუხა და ჰიმალაის კედარი.

პროგრამისთვის სპეციალურად შეიქმნა ვებპლატფორმა – https://cheminergi.eiec.gov.ge/ka, სადაც განთავსებულია ინფორმაცია პროგრამის, ნერგების სახეობებისა და მათი მოვლის წესების შესახებ. პლატფორმის საშუალებით შესაძლებელია დარგული ნერგების რეგისტრაცია და მათი ადგილმდებარეობის ნახვა ინტერაქტიულ რუკაზე.
პროგრამის მიზანია, ადრეული ასაკიდან ბავშვებში გარემოსდაცვითი ცნობიერების ამაღლება, ბუნების მიმართ პასუხისმგებლიანი დამოკიდებულების ჩამოყალიბება და გარემოზე ზრუნვის კულტურის განვითარება.

ინიციატივა აერთიანებს გარემოსდაცვით განათლებასა და პრაქტიკულ საქმიანობას – საკუთარი პირველი ნერგის დარგვით ბავშვები უშუალოდ მონაწილეობენ ქვეყნის გამწვანებაში, სწავლობენ ბუნებაზე ზრუნვის მნიშვნელობას და საკუთარი წვლილი შეაქვთ ახალი მწვანე სივრცეების შექმნაში.

ბათუმის შოთა რუსთაველის სახელობის სახელმწიფო უნივერსიტეტში, საზოგადოებრივი ჟურნალ „მაჭახელას“ მე-11 ნომრის პრეზენტაცია გაიმართა.

ღონისძიებას ხელვაჩაურის მუნიციპალიტეტის მერი ზაზა დიასამიძე, საკრებულოს თავმჯდომარე არჩილ მხეიძესთან ერთად დაესწრო და ჟურნალის დაარსების შესახებ ისაუბრა.

ღონისძიების ფარგლებში გაიმართა მაჭახლის ხეობის ამსახველი ფოტოგამოფენა, მოეწყო ვიდეორგოლის ჩვენება, რითაც სტუმრებს კიდევ ერთხელ გავაცანით ამ უნიკალური კუთხის ბუნებრივი სილამაზე, ისტორია და კულტურული თვითმყოფადობა.

ღონისძიებაზე აღინიშნა გამოცემის მნიშვნელობა ისტორიული მეხსიერების შენარჩუნების, ადგილობრივი იდენტობის გაძლიერებისა და მომავალი თაობებისთვის ჩვენი კულტურული ფასეულობების გადაცემის საქმეში.

ჟურნალის პრეზენტაციას, მერთან ერთად აჭარის უმაღლესი საბჭოს წევრი, ხელვაჩაურის დელეგატი, საკონსტიტუციო, იურიდიულ და საპროცედურო საკითხთა კომიტეტის თავმჯდომარე მინდია დიასამიძე, ბათუმის შოთა რუსთაველის სახელობის სახელმწიფო უნივერსიტეტის რექტორი ტიტე აროშიძე, მერის პირველი მოადგილე მირიან კვირიტიძე, განათლებისა და სპორტის მინისტრის მოადგილე ლუარა დუმბაძე, ნიკო ბერძენიშვილის ინსტიტუტის ხელმძღვანელი როინ მალაყმაძე, საკრებულოს თავმჯდომარის მოადგილე, საკრებულოს წევრები, უნივერსიტეტის ლექტორები და სტუდენტები ესწრებოდნენ.